半馬風景

10K提升到半馬，賽前最強只有14K，每周40的強度，年尾新年零練習，成績差早可預見，但仍然在接近2'22完成，總算hea交過。半馬的魅力當然是西隧，令人絕望的1.5K，封閉的管道，看不到盡頭的上斜，明明想全開逃離充滿松節油的環境，但理智和小腿告訴你，再快就抽啦!!再快就抽啦!!慢到叫dub出隧道，天已經亮了，那種感覺請參照「史泰龍」《龍出生天》一片。

捱過西隧，發現還有堂堂5K在前，在干諾道西天橋，盡了油、大風、冇人打氣，漫漫長路才叫人氣餒。15K的救命水站，又聽阿笙講手揸海綿保持清醒，不知怎樣又跑了兩公里，去到龍和道，終於捱唔住。係再三確保冇鏡頭下拉了筋，mp3已經完全不起作用，腦袋有無數東西飛過，眼睛開始模糊，「整整石化」了雙腳機械推進，咒罵自己唔一早練習，搞到最尾咁辛苦。

港外線碼頭到馬師道是最最最最辛苦的一段，應該是THE WALL，跑到洛克道，開始聽到打氣聲，鬥志又回來，大專學生疏落但美妙支撐著最後2K，想必是在turn down音量時按錯飛行模式，搞到Nike+ GPS唔到(失敗)。

一轉入鏡頭羅布的東角道、紀利佐治街，唔知邊到黎既力量二段加速，完成人生第一個半馬。過終點後5分鐘，狂食兩隻生蕉，一枝屈臣氏，一枝運動飲品，一隻梨，一條朱古力bar(其實即係食晒選手包d野)。

跑在彌敦道；得見對面線世界級的跑手(尹約基)；睇住阿紀同基保迪拍住拖迫住番黎；走過西隧；受到灣仔銅鑼灣途人掌聲鼓勵！各位10K跑友，下年一於挑戰半馬，最多我幫你西隧出口影相！！！

PS,為死去的跑手劉綽麟致哀，最少他堅持至最後。

2011年我最愛的電影十大

1.作死不離3兄弟，自Om Shanti Om之後，再次感動的印度片

2.呃錢帝國，2009金融海嘯紀錄片，一針見血，內容尖刻

3.危機解密，驚嘆Duncan Jones的天才，八分鐘的月光寶盒動作解迷版。

4.讓子彈飛，年初國片神作，話題潛台詞滿載

5.The Two Escobars，一解當年我對艾斯高巴被殺之誤解，足球迷必睇

6.兒兇，鬼片新經典

7.127小時，生命是永不放棄的Aron Ralston

8.奪命金，杜sir回歸寫實

9.丁丁歷險記，童年回憶+3D

10.哈利‧波特與死亡聖器(下)，the epic is now completed

十月唸唸碎

1．SN下周24集，話咁快做了半年，可以加入體記協了。睇番第一集（其實周不時都翻睇），呢六個月其實過得很精彩，甚至係月bn做4年幾最滿足的日子。

2．星期日明報寫到甘地的說話「最初敵人無視你，然後他們取笑你，跟著他們認真跟你鬥，最後你便贏了」對自己、對於SN、對BN都很有提醒。

3．想打邊爐，燒野食，但練跑季節又來了。

4．瘋傳盲搶鹽，流言刪Line，五十笑百步，庸人自擾之

幾段

1.撐過了，又覺得no big deal，人生就是這樣

2.日本女足鬥志可嘉，楓之力量注入！Power UPUP

3.勇者義彥與魔王城第2集仲爆笑！part-time刺客、升LEVEL、山賊、恐龍妹祭品、樹熊殺手，十個正

4.Mac Book Pro Mac Book Pro....

5.為自己做好SN !

517 random 5

1.新加坡F1搞好晒，仲有一季先出發

2.SN同daily 爭冇得爭，亦都最憎同人爭，但呢個遊戲總有個玩法既，唯有做好我們的本份，隊友們，我地係做緊好正既野!!

3.世界奇妙物语 第21年的特别篇...越黎越難睇...

4.黃色G-Shock 定 灰色574 ?

5.續上次random 5,cc ride個底認真唔掂

5月random 5

1.轉自潘達培導演的FB status : 「我沒有宗教信仰, 但是梵蒂岡神父隆巴迪的在回應拉登死訊時說的話值得細想: "不應為人死而感到興奮, 這絕對不是慶祝的時候, 而是反省人類責任的時候, 只應希望和平能早日開花結果.」

2.放假三日，可以做很多事~新加坡F1飛已訂

3.全力SN!!!!起啤起啤起啤起啤

4.方大同新碟，咁偏鋒！唔係好岩聽

5.身痕想試下adiads 對CC Ride

復活節之4

1.6月要清5日大假，為左慳錢睇F1，都決定唔會外遊，但想做一件有意義仁平時又唔會做既事，就係拎部DC/HDV 去拍自己鍾意既日系岩井俊二野，然後加埋音樂剪埋。

2.五月藍天白雲，正好戶外活動

3.狂loop Ann Vriend 的William and Kate

4.日日只訓4粒鐘仲夠精神做野，應該係一種GIFT

what's next!!

2006.12.4入職寬頻

當年離開左細榮之後，量左三個月地，先搵到野做。其實係做新聞部library，咁岩走左幾個PA，陳小新就打比我，問我有冇興趣做PA，於是入左導演組，一入就4年。當時明明阿花in我既時間講到鬼咁鐘意做資料室，一轉頭就跳左部門，諗番都覺得慚愧。

錢有時唔係最重要，因為從工作得到既，唔止係金錢。成日被人問你應該走啦，呢度冇前途，人工低工時長，其他台仲好發展！有時都會諗過，但一想到班並肩作戰的好同事，唔捨得。

因為去左outbound，激發自己去學遊水；公司比錢報渣打，鍾意上長跑，這些都是改變一生的事情。如果早年真係就咁走左，可以失去左依家覺悟既野。

升職導演，非常開心，但同長跑一樣，係長時間的自我競賽，點樣keep住把火，Stay Hungry Stay foolish，What's Next先係重點!大事回顧、未來主播PRomo、App Video Tutorial 我既時間管理一塌胡塗，優柔寡斷拖拖拉拉一再出現，改！一定要改，仲要快改，要學習的地方多的是，老闆都要不停學習，何況小職員如我。Feel到自己叮左半聲，仲爭D~未叮晒。

對於新聞部的上司前輩後輩新知舊雨，多謝大家多年來的照顧！將來仍然要大家提點幫助，誠如小新話齋，製作，一個人係完成唔到。

歡迎邀約食飯！因為我真的很高興！終於有卡片了！

PS:阿笙、ET唔黎，係有點失望，不要隨便拒絕我嘛！很Hurt的

random 5

1.有時自己太清高太潔癖，想深一層六千蚊對被冷待很久的貧苦大眾，是一份珍貴的禮物。不過仍然無改曾俊華給我冷酷的感覺。

2.hkiff 應該睇10~14套

3.工聯會又記錯報名日期，同時又燃起讀國際政治的念頭。

4.mad anchor 80%complete, app promo 15%.....sigh

5.一年一度公司足球賽，球技0增進，只求有氣走多步。

幾則

1.十公里個人時間55'19"，不太滿意。今年希望多參加公開賽，為來年半馬準備。先放肆埋本周，下星期復操。

2.財政預算案按LIVE，三位早更同事一同提早返公司準備，證明大家同心目標一致！大事必成！結果導演組LIVE很順暢，我只仍犯一個小錯，但這種ko的滿足感，只有在腎上腺素爆升之後，胃痛不斷之後出現(PS. touchwood，唔好成日有，間中一兩次ok)

3.堅持錯一定要早犯，咁個人先會大

4.電影節+奧斯卡

5.三月份要去工聯會報韓文了

兔年第一次念念碎

1.「苦」年病到兔年，唔見銀包唔緊要，補領麻煩唔緊要，要慘係唔跑得，個人冇晒鬥志

2.病完先發覺，健康訓得真係好寶貴

3.好在新年返工逗利是，嘻嘻哈哈地同好同事們一齊開工，先開心返

4.打呢篇野，因為阿記on9無極限，比喜鵲下半場連入4球追平，痛失2分，依家嬲到訓唔著

4.1 曼聯竟然輸比榜尾狼隊，突然安心訓教，哈哈

5.3月台灣行，好似要plan了，同志們

6.如果搵唔返張回鄉證，決定自罰3年唔返大陸

周二念念碎

1.第一次跟同事由葵涌運動場跑入麗城，好有趣好興奮，不過途經墳場、葵殮，心裡有點毛毛的，但冇跑圈咁大風同咁悶。

2.講開凍，覺得天氣冷咪著多兩件衫，沖個熱水涼、或者早D訓啦，開口埋口冷冷冷，男人大丈夫，明係博人留句take care加衫，超錯。難怪報紙話港男質素下降：早一代咬緊牙關游海水落黎架，生存落黎都係精英，現代就FB撒嬌認真嘔心，唔好講抗逆力，抗冷力都等於零。

3.接2，所以又講少年時代的座右銘是「三人行必有我師」，最近想加句「律己以嚴、待人以寬」，年來EQ也變得不太好。

4.律己以嚴是，大事回顧放上Youtube後，看了一遍又一遍，小新給75分也是人情分，自問只有65-70。節奏剪得太急，沒有以觀眾的心情去做，大家唔明的，如何十年後有回憶呢。堅係達到這水平的，只有part 1同政改，我預備做得唔好。另外我排次序都有問題，誠如聰說，電視風雲應該接科技排尾二，中間接醫改同打工仔悲歌即時冇晒mood。如果下年再做，希望係控制時間同內容規劃可以同編輯再夾好些。

5.大學睇完梁望峰先睇番《挪威的森林》，覺得堅係中正男人心理，陳英雄拍完《三輪車伕》之後其實冇套掂，今次拍《挪》不寄厚望，村上的看試片後驚訝係：「我寫係男人的故事，點知變左四個女人的故事」。決定用iPad重看一次，很多情節也忘記了,但回味。

6.最後分享一段蔡康永的微博

「上段戀情,全心投入,結果重傷.於是這次戀愛怕受傷,就很保留。這意味著:上次那個傷你的爛人,得到最完整的你,而這次這個發展中的情人,得到個很冷淡的你。我知你是保護自己,但這若是做生意,你這店一定倒的。永不再來的惡客,得到最好服務,而新客上門,卻備受冷落,這店怎麼不倒?【康永,給未知戀人的愛情短信】」

今時今日咁既服務態度係唔得架

2011首個念念碎

1. 如何好好地on duty，諗左兩日，鬱悶

2.小明下集youtube破5萬8，爬左曹格頭成為channel no.1；2011年開始會tag埋記者名，希望谷起埋其他故仔

3.11年，下定決心學打鼓，傑仔老師，麻煩你，仲有學韓文

4.3月會去台灣睇莫奈畫展，年底希望去到東京

5.想換個銀包，有冇好提議？

6.放工番屋企，冷到只想訓覺

2010最後的念念碎

1.2010完結前，用花紅買了一隻山度士給自己，前一晚用了3個小時在討論區刨文，得到第一隻瑞士芯的機械表，興奮得難以形容。

2.又完成一年大事回顧，今年是十分十分想超越上年的，但稿件內容及美術設計以及音樂曾經有很大的變動，令自己相當不安，壓力大得發了幾日惡夢。今年通霄日數也是前所未有地多，但小組成員一哥、秋、聰、K、笙、盈盈，共同努力，我大部分時間都不算帶領得好，但大家都「給力」做好節目。一齊趕工成功出街的滿足感真是很甜美。

3.HP7上集兩大看點：Emma Watson靚到癲，佢著冷衫靚到；榮恩和妙麗的愛情線好睇過哈仔玩自閉。

4.Tron Legacy 極失望，3D唔知睇甚麼，結構很鬆散，一心以為個世界觀會宏大D，還是《電子世界爭霸戰》經典。

5.大事回顧後，2011年還有更大挑戰。

6.攝影又停頓了，苦悶。

幾則

1.呢幾日天氣跑步超級爽！涼風陣陣，今日做2分鐘鬆d做左15圈，步姿又突然門明白左，大大改善肌肉負荷，50分鐘目標形勢大好！

2.做左iPhone4終極慳電測試，係彩虹站得番2%電量，跟手熄晒3G Edge，齋播歌，竟然可以捱到番屋企仲有1%，個度都成25分鐘架，iP4真係巧威威啊！（註：Sub台iPhone用戶已經達75%，Cherry同一姐都有勒，而剪片組相信月內可達100%，請其他組別同事繼續努力吸毒！）

3.最近好興摺高褲腳，十條仔有七個都摺，唔知點解點睇都好唔順眼，尤其是牛仔褲。可能我都試過，但摺完好似賣魚佬咁，所以人地咁著就知好唔知點咁，簡直同飛輪海頭咁一樣全方位7！

4.Miss A 之後2PM 之後 2AM，JYP係咪好唔掂，洗唔洗咁密

5.經事實証明，係阿鄭大師VO既突發先可以破萬Views，求原因！

放假念念碎 10.15

1.有時買野送比人，仲開心過買野比自己

2.又諗住買件chocolate X 小肥肥一族，點知史歷奇tee得女裝！Sign

3.智利礦工全部逃出生天，智利總統皮涅拉贏晒。

皮涅拉由始至終守在現場為工人打氣指揮救援，雖然最終勁擁抱慶祝有做大show的成份，但他支持率都已經飊升到70%以上。佢本身已經係億萬富翁，擁有智利電視台，智利航空及足球隊科拉科拉，簡直係智利版超人。年初智利大地震發生時，皮涅拉尚未正式就任智利總統，不過佢係災後迅速組織救援，又係twitter發布災情，吸引全球救援，赢晒信任和支持。就算佢係智利影帝，他都叫成功救到人嘛，抵唔抵得先。如果拍電影，真人做番都OK

4.iPhone4 JB後，我覺得依家部機勁到好似工程機咁

5.好怕睇牙醫，唯有努力刷好D牙

6.Yahoo!視像新聞好多人睇，同事既士氣都一齊提升到very good

7.Yearender前期啟動

放假念念碎 10.05

1.秋天來了，購物慾消失殆盡，反而食慾大增，很想很想很想很想打邊爐，食涮羊肉，或者食韓燒，牛啊

五花肉啊

2.又在想念北投同白濱的溫泉，尤其在跑步之後，旅行的愿望.......面向太平洋的溫泉浴場

3.葵涌運動場10K達成，Hea跑下，都係一個鐘，渣打前要加操了

4.HP7 11月上，之前要快d睇晒小說，今晚一於聽住jazz睇

5.看了《唐山大地震》，陳道明的型像，令我不禁想起去世的公公，「沒了，才知道甚麼是沒了」

6.HKAFF on9地買左撞時間的飛，有冇人有興趣睇《杜Sir有種》@30/10 4:00PM BC 同埋《曼谷你好》@5/11 7:45PM IFC，朋友價六折出讓！！

放假念念碎 09.07

1.跟公司教練跑已經第三課，改善左步法同擺手，明顯舒服左，大滿足

2.每日check住apple store order status，已經成為強迫症

3.一口氣追番3個月的《我結》，好感度都係阿當＞維尼＞紅薯

4.物慾突然飊升，Instax Mini 50S，Zens Umbrella，AC Milan印Inzaghi，但強制每月只能一件！

5.緊接上者，所以寄望1137爆升上6蚊，唔該王生

6.收到中壽2009年股息，月供股票終於見到成果，繼續繼續！

我又幾句

1.iPhone 4忍手唔買住(好難的)，一連買兩部 i 野好奢侈姐，到11月peoples完約先

2.放假走去追蹤《志明與春嬌》場景，好鍾意一個人四圍搵check point既專題攝影

3.去藝術館免費入場睇吳冠中，大師的創作思想－風箏不斷線，給我一記提壺貫頂

4.拉傷肌肉小休一個月，今日開始忍不住輕度跑步練習，因為肚皮的贅肉又回來

5.Summer IFF只買了深山有間笠酒店

6.我好想行山！！！！

7.Vettel今年，我只能講，希望越大，失望越大

8.巴塞幾時出架，我要買些路迪寄誠庸

9.有人辭官歸故里，有人漏夜趕科

keep running

半個月的世界杯，日夜癲倒又狂啪零食，漸漸就長出肉來。終於在A更日，忍無可忍，落街jogging廿分鐘。

右腳肌肉拉傷還是微微作痛，但乘著清風，也是愈跑愈快，把身上的冷氣、懶氣驅散。

早陣心情反覆，終於爆發了，令同事麻煩，很不好意思；其實自己只是耍性子撒嬌吧，完全討厭這樣的自己，應該可以表現更成熟吧。再是出席魏永征教授的榮休晚宴，登時發現已身為前代師兄，總不能再孩子氣吧，是否可以重拾以前以「硬食」為傲的優點?

跑啊跑，一口氣，未必能將凌亂的思緒梳理，但廿分鐘的空白，痛快！

經一時長一智，專注做事，以待天時。

running BGM : 8eight - 이별이 온다